Roedd Rhagfyr y 5ed yn ddiwrnod arbennig yn hanes ein Cynulliad Cenedlaethol. Diwrnod pan roddwyd llais i bobl ifanc ein gwlad drwy ethol Senedd Ieuenctid gyntaf erioed Cymru.
Ond beth mae hyn wir yn ei olygu i chi a’ch ffrindiau? Sut fydd y Senedd Ieuenctid yn berthnasol i chi ac yn cael effaith positif ar eich bywydau?
Gadewch i mi egluro drwy ddechrau yn y dechrau.
Y Llywydd yn lansio Senedd Ieuenctid Cymru yn Eisteddfod yr Urdd, 2018
Mae sôn wedi bod am sefydlu Senedd Ieuenctid i Gymru ers blynyddoedd maith. Mae’n achos sy’n agos at fy nghalon i a nifer o Aelodau eraill y Cynulliad, a drwy gynnal sgyrsiau a rhannu syniadau, adeiladodd y momentwm y tu ôl i’r egwyddor y dylech chi bobl ifanc Cymru gael cynrychiolaeth ddemocrataidd gan eraill o’r un oedran a chi ac sy’n deall y materion sy’n bwysig i chi.
“ROEDD HI’N HOLLBWYSIG FOD POBL IFANC WRTH GALON Y FENTER O’R CAM CYNTAF.”
Gwnaed cyswllt uniongyrchol gyda phob ysgol yng Nghymru gyda llwyth o wybodaeth yn cael ei rannu ar y cyfryngau digidol am ffurf a phwrpas y Senedd ac, yn bwysicach na dim, sut i sefyll fel ymgeisydd a phleidleisio.
Sefydlwyd partneriaethau gyda mudiadau megis Youth Cymru, Voices from Care a Barnardo’s Cymru er mwyn sicrhau fod y Senedd mor amrywiol a chynhwysol a phosib.
Talodd yr ymdrechion hyn ar eu canfed gyda nifer gwych o enwebiadau i fod yn ymgeiswyr – dros 470. Cofrestrodd bron i 25,000 ohonoch i gymryd rhan yn yr etholiad gyda phob pleidlais yn cael ei bwrw ar-lein – yr etholiad cyntaf o’i fath yn y byd. Enghraifft arall o bobl ifanc Cymru yn creu hanes!
Penllanw’r holl waith hyn oedd ethol 60 o Aelodau Senedd Ieuenctid Cymru ar y 5ed o Ragfyr ac roeddwn yn hynod falch o gyhoeddi enw pob un yn Siambr y Cynulliad Cenedlaethol.
Nawr fod y syniad o greu Senedd wedi dod yn fyw, mae’r gwaith o gynrychioli eich safbwyntiau a’ch buddiannau chi yn dechrau o ddifrif.
Y penwythnos hwn, bydd y Senedd Ieuenctid yn cynnal ei chyfarfod llawn cyntaf erioed yn Siambr y Cynulliad ym Mae Caerdydd – yr union le y mae Aelodau Cynulliad yn trafod, yn craffu, ac yn pleidleisio ar y materion sy’n effeithio eich bywydau chi a phawb o bobl Cymru bob dydd.
Gobeithio fod rhai ohonoch eisoes wedi cael blas ar beth fydd gan y deuddydd i’w cynnig drwy fynychu cyfarfodydd rhanbarthol dros yr wythnosau diwethaf.
Myfyrio, herio, anghytuno neu gydweithio - dyma eich cyfle cyntaf i ddod ynghyd â phrofi’r swyddogaeth arbennig o gynrychioli safbwyntiau eich cymunedau a’ch cyfoedion wrth galon democratiaeth Cymru.
Rwy’n cofio fy niwrnod cyntaf yn y Cynulliad Cenedlaethol bron i ugain mlynedd yn ôl.
Rwy’n mawr obeithio y byddwch yn rhannu’r cyffro, y cynnwrf a’r fraint yr oeddwn i’n ei brofi’r diwrnod hwnnw – ac ydi, mae ychydig o nerfau yn gwbl naturiol!
Pob dymuniad da i chi gyda’r gwaith ac rwy’n edrych ymlaen yn fawr at eich croesawu i’r Senedd a dilyn eich datblygiad ar y daith gyffrous hon.
Gwn y byddwch yn gwneud pobl ifanc Cymru’n falch.
